广播专辑 弄堂茄山胡70 侪是宝宝

广播164 弄堂茄山胡 侪是宝宝 2014-08-25 10:20 0来源：新民晚报 新民网编辑：田诗雍 作者：任向阳 　　暑假一放，小区三日两头有得活动。今朝是沪语亲子游戏，轮到第三组“搀手认娘”。就辣小朋友蒙牢眼睛个辰光，妈妈们已经穿来插去调好了位置。叫鞭【哨子】一吹，小朋友开始跌跌踵踵朝前头寻过去，阿奶眼尖，看到孙子马上要踏着一只小凹塘，弄勿好要掼跤，伊急得放开喉咙极叫：“宝宝当心！当心掼跤！”伊拉孙子听闲话，立牢仔勿动了。啥人晓得，一排七个辣辣游戏个小朋友四男三女侪立牢仔勿动了。辣现场个发令员看勿懂唻：搿个阿奶本事哪能介大，一声宝宝，满场地个小鬼头侪停下来了？搿辰光草地边浪响起喊声一片：“加油，加油！宝宝加油！加油，加油！宝宝加油！”小朋友立时三刻动起来了，阿奶拉孙子也手忙脚乱，反而兜过了凹塘呒没掼跤，歪到右手方向寻娘去了。 　　还是志愿者有心，问过了大人小人，发觉场浪场下个小朋友小名侪叫“宝宝”，有“宝宝”17个、“阿宝”11个、“小宝”8个、“宝儿”5个，反正小名搭来搭去总归是宝宝，真是小朋友个个赛过珍宝。志愿者搿记闷脱了：现在个家长哪能老怪个，小囝起大名个辰光每家每户挖空心思总归想勿同于众，顶好是标新立异，弄得交关生僻字冷僻字电脑打勿出来；叫起小名来倒侪勿肯动脑筋，弄勿出花头经，家家人家侪盯牢仔“宝”字勿肯放，大概是心里向拿下一代当作宝贝还勿够，一定要嘴巴叫出来再算刹念【过瘾】。 　　第三组后头来侪摸着熟悉个手寻到了自己个娘，顶慢个用脱9分多钟，有个是摸手背浪个筋脉，有个是撸五只手节头，有个是从手臂把摸到手底心，有个是一把捉牢右手荡来荡去分辨节奏跟平常白相个辰光阿是一式一样，有个是摸到左手腕浪个玉镯，有个是捏牢大拇指反复搓……志愿者讲，到底还是小囝聪明，大人反而呒没小囝介活络，至少起小名个辰光缺少创意。