广播专辑 弄堂茄山胡87 搭贺友直一道“咪老酒”

广播182 弄堂茄山胡 搭贺友直一道“咪老酒” 2013-08-12 10:48来源：新民晚报 作者：黄沂海 　　贺友直老先生寄来个贺卡，称得上是名副其实个“贺”卡了。“贺”卡独一无二，市面浪向买勿着。有一年寄拨我个“贺”卡，伊拿自家画成一甏老酒，吃醉脱个样子，连搭眼镜也戴歪脱了。壶边写了一句闲话：祝能走能看能听能喝能吃能想能画能写能提得起放得下……话语老朴素，意味交关深长，寄托了伊乐观豁达个人生态度。伊还垃拉壶身浪工整个题写：“阿海先生健康”，并盖了“天地一壶宽”闲章一枚。天地之大，统统垃拉心里向！ 　　贺友直欢喜咪老酒，报纸高头老早披露过伊每日个作息辰光表：11：30搭18：00迭两个时段，伊侪要咪老酒，几十年如一日，雷打勿动。老酒，绝对是贺友直艺术创作个“生命口服液”。有一趟我到巨鹿路伊个“一室四厅”谈画，勿知勿觉到了中浪向，我想请伊到附近个一爿咸亨酒家吃饭，贺老先生讲：外头个饭店再好，哪能有自家“下饭”香？我叫老太婆弄几只小菜，再开两瓶老酒，阿拉一人一瓶，边吃边聊！所以讲，我也有幸同老先生一道吃过“生命口服液”。 　　眼面前，有些个画家动勿动就自封“泰斗”、“大师”，贺友直听了觉着触气。伊特地翻了翻《辞海》，查了“泰斗”迭个词，老先生发急了：搿个是泰山北斗啊，看了心就慌了，哪能敢当啊？画画个，够得上“画家”已经蛮吃力了，更勿要讲是“大师”来。讲起 来，贺友直垃拉连环画创作高头个成就，大家侪看得见。伊个代表作《朝阳沟》《皮九辣子》《十五贯》《小二黑结婚》咾啥，部部侪是精品。 　　一趟“咪老酒”，我问贺老师，侬画啥像啥，到底有啥个诀窍？伊回答我六个字：记得牢，搭得拢。记得牢，就是勤于观察，从生活里搜集素材。画《山乡巨变》时，伊就住垃拉农民屋里头，从早浪向起来开门，到夜里向关灯睏觉，盯牢仔农民个生活细节，用心看，用脑子记，闭上眼睛就会产生形象。哪能像现在个画家下生活，搿仔照相机拍一圈就回来了；搭得拢，就是垃拉创作当中得心应手，调动交交关关个积累，准确描绘出特定个人物跟场景。伊个《小街世相》里头，老上海、旧街道、各式各样个人人头，垃拉纸头上“活”起来了。搿种老底子个气息朝牢侬一记头扑过来，邪气有味道。 　　贺友直个作品，我囥了几幅。十几年前头，我垃拉夜报浪发了一篇老早弄堂里乘风凉个文章，贺友直看了打电话拨我讲老扎劲个，我索性掼了一只“彩色翎子”：要么请贺老师帮我画一幅乘风凉个图画？啥人晓得呒没多少日脚，伊就搿画送过来了。打开画卷，熟悉个白描线条鲜蹦活跳：垃拉没空调个年代，老百姓热天介个衣食起居，侪垃拉弄堂里向做起了市面。东家阿姨搬出木桶脚盆，搿弄堂口个水井弄得“吭哧吭哧”，一歇歇木盆就盛满了井水，阿姨搿一家人家个衣裳，汏得清清爽爽，用下来个压末一桶水，还勿忘记顺便冲一冲自家门口个弹硌路；西家爷叔摆开小方桌矮板凳，端出家主婆烧个萝卜干毛豆子，扁尖冬瓜咸肉汤，倒上一杯“特加饭”，慢慢咪一口，快活赛过神仙……看画还看出了意外发现，图画角落头搿个睏垃拉竹榻上看书个老头，哪能看侪像贺友直本人。可能，天气热得忒吼势，叫伊只好放下画笔，走出屋里向，到弄堂口个路灯下头，摇摇扇子，读读闲书，望望野眼，寻寻画图个灵感。 　　去年是贺友直个九十大寿，伊关照勿要摆圆台面，勿要出辣花头。乃末，伊个娘家上海人民美术出版社，为伊操办了一场叫做《率真贺友直》个画展，看过个观众侪讲好白相。我刚巧出差，呒没能赶上开幕个场面。好垃拉出版社个李新社长，事后送了一袋画展个纪念品拨我，袋袋里向还有一瓶老酒，酒瓶印满了贺友直个漫画作品。我先拿老酒囥起来，等贺老师从宁波乡下头回来，再约伊一道咪老酒吧。