广播197 弄堂茄山胡 年脚边头

广播197 弄堂茄山胡 年脚边头 2013-02-06 16:35来源：新民晚报 新民网编辑：田诗雍 作者：胡宝谈 　　刚刚日出卯时。东厢房癞痢拉儿子心是热，也难怪个，四年里头一趟【dha】贵州转来探亲呀！乃花生炒好拉哉，炒瓜子哉。香味道洇【yin】进来仔，前客堂两个小鬼头也呒没心思睏唻，面也勿揩【ka】，头颈伸长仔两寸，东张【zang】西望。姆妈头浪三角围【yhu】巾扎好仔，身浪一件蓝布衣裳一副蓝布袖套，拿仔块干揩布，大橱咾皮柜【jhu】咾樟木箱咾一只一只撸过来。爹爹戴顶压发帽，叼仔根香烟，着个件士林布罩衫像煞是姆妈个末，芦花扫帚缚【bhok】辣伊丫【o】叉【co】头浪，平顶扫好仔，乃扫画镜线辣海。“喂，谢谢侬香烟好覅【fhiao】吃了。一头掸遗尘一头的【dik】粒笃落，屋里弄得清爽了啊！”爹爹申报纸敨【tou】开来，喔唷，原块头白巧克力啊？哎呀，哪能滑到伊桶里去拉了。“当心呀！”姆妈拖牢仔阿三头，捷转头请爹爹吃排头哉。“侬哪能又拆洋烂污拉了！脱侬讲仔呒其数哉，生石灰先摆，水后添。侬看看看，灒【she】辣领头浪，上去一眼眼就是眼乌珠！”“勿搭界个，我老法师了好？”“侬欧，喊侬做眼事体真牵丝欧！”“葛末侬自家做好了！”“自家做只有好唻。”“阿娘，小黄鱼买着了？”西厢房爷叔也拎仔一只空篮头转来哉。“犯关呒没买着啦。一上半日小菜场跑仔四只得唻。”“阿娘侬覅急，五个宝贝女婿勿是后日来末。我问清爽了，明朝有个。夜头关照伲阿大也脱侬砖头摆一块辣海。”“喔唷，我真真意勿过，旧年仔也是……”喔唷，勿晓得嚡伊个女小囡打只传呼电话来呀，喊伊半夜把一道买蹄髈去，乃伊跑得快。”“侬福气好个噢。”阿娘眯眯笑。“啥福气啦？”后客堂嫂嫂也笑唻。“只小鬼头还小唻，刚刚上班呒没两年唻。”“勿小唻，像阿拉老早仔啊，阿大老早做爷唻。”“蛮好呀，”西厢房爷叔头搭搭。“一个夜头造造反反闲话好讲唻，外加比荡马路做人家。”“我有眼心勿定呀。”后客堂嫂嫂眉头打仔结。“伲阿大毛头小伙子……”“喔唷，侬笃定拨伊拉排去，介许多眼乌珠盯【shok】牢仔，对勿啦，侪是电灯泡呀。”“阿娘烧小菜了啊？”苏州好婆摇记摇记摇进来哉，手里掇【dak】仔只茶盘，里头三只小碗。炸【zo】慈菇片、炸龙虾片、炸春卷，前楼二房东讲迭个是好婆三步头。“我剪仔几只花样，阿娘玻璃窗浪贴贴白相相噢。”“上海来仔多【da】年哉，哪能闲话原旧讲勿来啦，阿拉实能大年纪发啥财啊？”“蛮好蛮好，”好婆笑了交关焐心。“乃日脚好过哉。日脚好过阿是赛过发财啦？想想伊个辰光伲小毛安徽插队，关照伊拉留辣农村过啥革命化春节，伲小毛孝我个呀，喔唷，爬火车爬转来脱我一道过年……”新年到，做元宝。大块头冰蛋烊开来仔，搉【kok】两只红壳鸡蛋进去，双筷“拍拍拍”甩【huak】蛋欧。【dhen】，老张相帮仔煤炉拎进来哉，歇歇功夫钢种汤勺热哉。“正朝倒热了快个呀。”“我吹伊热个呀。”老张望准家主婆小耳朵浪吹一记。“十三点。” 　　沪语小词典 　　日出卯时——早上五时至七时。 　　掸遗尘——过年前掸去房顶、四壁、檐下的灰尘。 　　敨——振，抖搂，例如“拿被头敨敨清爽”；展开，例如“一张报纸敨开来”。 　　小娃儿——男孩，来自宁波话。“娃儿”发音如“畏”，是“娃”的儿化词。 　　捩——绞，拧，例如“螺丝捩断了”，“揩布里个水捩捩干”；折，例如“棒头拨我捩断脱”；曲，折，例如“我捩转仔手做生活”。