广播231 弄堂茄山胡 搿一夜，阿拉收红包

广播231 弄堂茄山胡 搿一夜，阿拉收红包 2012-01-24 13:11 来源：新民晚报 作者：李元 新民网编辑：王玲 　　【新民晚报·推荐】小辰光我特别欢喜过年，原因老简单，大人唠啥侪拥到阿拉屋里向跟我爷爷奶奶拜年，乃末还围牢我转，拨我压岁钿。还可以听到交关邪气适意个闲话，比如讲，迭个小囡两眼炯炯有神，成绩一定勿错，迭个小囡文文静静以后长大一定是个大家闺秀……勿管真个假个，迭些客套话让年小个我听得老写意，看看窗外星光璀璨屋里热气腾腾，我一记头觉得眼门前出现一条平坦个康庄大道垃拉等着我去践踏，将来个日脚一定会过得比现在更富足搭美满。 　　每到晚饭吃到一半个辰光，几个大人侪会得从袋袋里或者大衣内侧抽出红包塞拨我，迭个辰光阿拉姆妈就会冲过来做出一副死活勿肯收个样子，乃末送红包个人也随着伊个摇摆开始摇摆，勿过搿点个红包是早晏【e，晚】会落到我手里。我有礼貌个接过压岁钿，一个转身进我自家房间，撕开红包点钞票。一般而言搿些闲话勿多西装笔挺个人拨钞票顶多，伊拉淡淡个拿红包递拨侬，顶多讲一句新年快乐，就淡淡个又走了。而还有些喝得面红耳赤讲话大声，边拨侬红包边吐着唾沫星子叫侬拿了压岁钿之后一定要好好读书个，拨个一定老少。 　　搿辰光我勿晓得为啥电视里个小囡收了红包就跟考了一百分一样活蹦乱跳，搿眼编剧肯定勿了解小囡，想想有啥好开心个，我拿了红包侪交拔我姆妈，阿拉娘真正是最终受益人，我顶多算个中介。记得有一趟一个带戴金丝框眼镜个爷叔塞拨我一只蛮厚个红包，一转身我就交拨了我姆妈。但伊有一个邪气宏伟个理由，搿眼红包正好用来搭我付学费。 　　当我念起搿段勿计红包个青葱岁月，心里总归有眼感慨。有种感觉失去了就寻勿回来个味道，当我开始真正关心红包厚度个辰光，几个亲戚家个小囡也上起了班过上大人个日脚，我也该为以后个塞拨其他小囡个红包做起准备。一年到头，顶开心个还是埃些天真无知个，学着大人点钞票个模样数红包个日脚，那交作业个姿势交红包，用你追我赶个笑声告诉身边个大人，阿拉有红包啦。