广播233 弄堂茄山胡 搿一日解放喽

广播233 弄堂茄山胡 搿一日解放喽 2012-05-01 13:26 来源：新民晚报 作者：黄顺福 新民网编辑：王玲 　　【新民晚报·推荐】解放上海搿辰光，我刚好七岁。要打仗哉，爷娘拿我搭阿奶从浦东外高桥接到浦西，垃拉七转八弯弄堂里，伊拉租一间勿到十平方个矮平房。 　　搿一日，我听见交关大人讲，昨日一整夜子弹嘘嘘叫，脚步哗哗响。我睏得死，啥也呒没听见，问哪能叫法？炮开？啥人也讲勿清。正拉垃讲张，辣陌生头“呯”个一声，大家吓仔一跳，边浪是一条断头弄堂，啥人跑进去掼炸弹啊？跑到马路浪，我寻仔半日，连粒子弹壳也呒没看到，勿要讲炮弹坑哉，总算拾着一粒子弹，拔脱弹头，里向头装个是玩具小刀。隔壁断头弄堂有啥炸弹？地浪一包黄军装，猜想是国民党逃兵掼下来个。“谁家小孩？快回家！”有人对仔我喊，山东闲话，急来邪气。我别转屁股就逃，只听“轰”个一声，蓬尘飞起。大人讲，是手榴弹爆炸，亏得解放军救仔我一命。迭个打仗呀，伲小囡孛孛跤都比伊闹猛，太太平平个就解放哉。 　　再勿回去，小黑要饿煞哉，阿奶带仔我上路。一到外高桥，气氛顿变，田里侪是七高八低个碉堡，坟墩头一样，有个有两层楼介高。碉堡身浪布满仔弹坑，有个地方像大火烧过，墨墨黑。射击孔像拨拉啥人挖脱仔眼乌珠，留下钢筋戳出骷髅眼眶。一条条个壕沟里侪是弹坑，像拨拉啥人拿仔把刀拉垃肚皮浪乱划乱刺。河浜边浪到处一箩筐一箩筐个子弹壳、一把把坏个好个步枪卡宾枪、一顶顶带血个橄榄帽。桥下头横七竖八十几把铁铲，柄浪“USA”字样拨拉黑漆漆个血迹涂得像鬼画符，我勿敢拿。一辆装甲车死乌龟一样躺拉垃西斜个阳光下，履带断脱，像条死蛇。驾驶窗搿玻璃碎得七零八落，窗里向插仔一根芦柴棒，上面挂拉一件白衣裳。仗打得介结棍，啥人会记得晒仔衣裳要收？阿奶笑我拉垃瞎三话四。 　　小黑摇头别耳朵迎出一里多，一条前腿血淋溚渧个，有人告伊包仔块布头，搨仔点药水。家里个房子炸塌一大块屋角，幸亏有人拉垃里向头支撑仔几根木头，呒没倒塌。庭心里扫得清爽来蓬尘呒没一粒，树浪个白蒲枣正拉垃泛白，树干枝浪一顶红五星军帽荡法荡法，上面汗迹血迹像画个花样。生蛋个芦花鸡是阿奶个生命，伊来煞勿及跑到鸡笼前，弯下腰，看到两只鸡好好个匍拉里向，伊笑哉。走进灶间，看到灶台浪摆辣鸡蛋，一数，六只，伊摸辣蛋浪个手有点发抖，眼睛里含仔两包眼泪搭我讲：“小郎，迭个兵哪能介好个啦，连一只蛋也勿碰，天变哉！” 　　后来，阿奶故世。我拿伊葬辣辣高桥烈士墓附近个自留地里，阿奶拉垃天堂里搭