广播234 弄堂茄山胡 照相馆 照相机

广播234 弄堂茄山胡 照相馆 照相机 2012-05-22 15:52 来源：新民晚报 作者：阿狗 新民网编辑：王玲 文/阿狗 　　【新民晚报·推荐】垃拉四五十年前头，随便哪能想勿到今朝拍照片会得介普及、介便当。阿拉小辰光，拍张照片是事体。要约好辰光，打扮好仔，到照相馆去候垃海。伊拉照相馆老忙个，跑了起，一歇歇勿一定拍得着，要挨次序个。 　　搿辰光照相馆垃拉上海还勿是老多。像我小辰光住垃靠近斜桥，搿搭附近只有一爿“金刚”照相馆。一年总有个几趟去伊拉店里拍照片。照相馆拍照片个地方，像戏台一样有布景，还一层一层个，电灯泡几十只锃锃亮，照垃海老热个，小辰光拍照勿要忒紧张喔。拍照师傅拿头蒙勒块黑布，对啊对，一歇歇像变戏法一样钻出来，手里拿个“皮球”，“咔哧”一记，招呼大家一声“好”，灯光统统灭脱。伊从机器里拿出一块玻璃，垃拉上头写两个字，关照?几时来看样子或者拿照片。迭能照片就算拍好。阿拉男小囝简单，梳只“西装头”，穿件新衣裳，着双新皮鞋，就可以出客拍照片了。伊拉小姑娘花头经多了，打扮梳妆勿算，还要拍戏装照。搿个辰光一般个小照相馆还勿肯去，一定要到“金都”去看样学样。照相馆里人又轧，加上阿拉钞票勿够，“金都”挨勿进，就到对过“玲珑”去拍只有手节掐大小个弥渳【mi】照片。拿了照片，还用红颜绿色往上描，弄得有点怪里怪气、异样刮搭。前两日我垃拉小区里胡阿姨屋里，看到她年纪轻个辰光拍个交关戏装照，仍旧光彩照人、活脱脱头排花旦个派头，赛过几十年辰光呒没过过一样。 　　后来人慢慢叫长大了，心里拿照相馆也有了分档。大事体一定要到“王开”、“中国”、“人民”，艺术照到“蝶来”咾啥，拍张报名照末就随便寻家照相馆拍拍算了。后首来阿拉开始关心照相机了。屋里有照相机个同学老吃价个，外头白相去侪围牢伊拍照，老开心个。最最难忘个是1962年，夜里向放脱功课书包，奔到中百公司去看日本“卡农”相机。我勿是去一趟，而是有空就去。日本产个照相机介小，介漂亮，一百多块，乖乖！迭个辰光差勿多每个男生侪有过热天钻阁楼自己印照片个经历：汗溚溚渧弄到大半夜，呒没一点声息。第二天，还要从玻璃浪扌枭【xiao】上过光个照片，轧出花边来。后来阿拉侪有了自己个照相机。有个同学还自己搞了个摄影室，拍自己喜欢个人像、花卉等专题照片。今朝阿拉手里个照相机已经升级换代了好几趟了，勿谈有了小个卡片机，还有了可以换几个镜头个单反数码相机。自己垃拉屋里，印彩照用勿着“汗溚溚渧”，修好或者合成一件作品也不再是“捏鼻头做梦”个事体了。