广播255 弄堂茄山胡 天灯弄

广播255 弄堂茄山胡 天灯弄 2013-04-22 09:28来源：新民晚报 新民网编辑：田诗雍 作者：寿幼森 　　垃拉上海黄浦区老城厢个巡道街边浪有一条弯弯曲曲个小马路叫做“天灯弄”，建于1929年。哪能会有迭个名字？是因为老早子巡道街浪就是巡道衙门所在地，衙门口夜里向一直有一盏风雨灯【煤油灯】亮拉海，迭个辰光整个上海马路浪侪呒没路灯个，直到1882年上海再开始有了第一家“电光公司”，所以搿搭有只灯是老稀奇个事体。辰光一长，大家就拿原来个名字“竹素堂街”叫做天灯弄了。 　　天灯弄浪有名气个勿单单是因为搿只煤油灯，还因为原来天灯弄77号是相当有名个“书隐楼”。“书隐楼”建于清乾隆二十八年（1763年），号称明清时期“江南三大藏书楼”之一，另外两个地方是宁波个“天一阁”搭仔南浔个“嘉业堂”。“书隐楼”原来是明代陈所蕴(万历进士，官至刑部员外郎、江岳参议等职)个私宅，里向宅园名字叫“涉园”。迭幢清代豪宅里个木雕搭砖雕堪称旷世之珍，1987年便被确立为市级文物保护单位。后首来陈氏家道勿来三了，搿只宅子搭仔园子侪买拨拉浦东陆深后代陆明允。陆氏接收后开始装修，同时增建“传经书屋”，就是现在讲个藏书楼。后来陆明允个曾孙陆锡熊考中进士，参与《四库全书》个编纂。乃末乾隆皇帝赐《松南小隐图》(由杨基所绘)拨陆锡熊；又请老朋友沈初(乾隆榜眼，官至尚书)题匾“书隐楼”。 　　只可惜是2008年7月份，一场名字叫“威马逊”个台风从上海擦过，风力贼大，年久失修个“书隐楼”个西厢房轰然倒塌，现在大家只好看到一块文物保护个石碑了，可惜！