广播专辑 周立波海派清口9 上海的穿

广播专辑 周立波海派清口9 上海的穿 葛末我想呢我讲交关三十年前个事体，搿恁难免由于辰光跨度大，搿恁难免有失真，失实，失误个地方，我希望各位朋友能够原谅我。我希望娜能够像原谅娜个领导一样个原谅我个无知。迭个我意思讲呢就是讲我并勿是讲阿拉领导就一定无知哦。当然了，一般无知个都是领导。搿句闲话是勿对个。领导哪能可能无知呢？！领导埃个叫大智若愚。一个勿会装糊涂个领导，就勿会是个好领导。三十年呢有交关变数。．．．．．． 散户可以变成大户，大户可以变成散户。散户也可以变成阿无。赤佬可以变成模子，模子可以变成赤佬。搿个就叫赤佬模子。．．．．．．阿拉全中国个服装个颜色加起来，基本浪勿会超过一只手个。是伐？蓝个，绿个，白个，灰个，红个。哦，黑个，黑个。谢谢，黑个，蛮吓个。哎，就搿点颜色了。对伐？邪气单调。．．．．现在想想老憨(ghang)个。但是呒没办法。......葛末娜去看哦，娜要去看搿个城市搿个国家时装个文明开化程度，娜晓得应该去啥地方去看伐？我讲拨娜听噢，就到游泳池去看。到海滨浴场去看，一定看得出，邪气微妙个。1978年前头，据我个回忆，跑到游泳池去看哦，衣裳男个女个只有两种式样，男个就是平角裤，女个也是。男个平角裤迭个游泳裤而且勿好老包个！老包个闲话会出来一个老结棍个救生员拿侬（捄出去），“流氓。”阿拉眼女同胞最为罪过。...... 就是一种游泳衣。搿种游泳衣也勿晓得叫啥个式子。反正娜记得伐？就是也是平脚个。乃末只有迭种红个，蓝个，对伐。反正就像600只百叶结挂了上头一样。是搿种伐？但是勿晓得啥个式子。反正侬多看对伐？侬眼睛头皮会发麻个。罪过啊，再漂亮个小姑娘搿恁着游泳衣。后头稍微好点。改革开放初期噢，搿搭多点式子了，围了一圈布头。对伐？像甲鱼个裙边一样。埃！1978年以后.....游泳池里向也有变化了。哪能叫变化？我比较细心。我发觉搿个游泳裤啊，特别是阿拉女同胞，搿个游泳裤迭个角度啊？平均每五年往上头走二十度。真个！本来一百八十度平脚。五年一百六，五年一百四，五年一百二，现在是直角。后头一看？呒没睐。......特别是对阿拉一眼小姑娘来讲，我有一个重新个定义。侬看迭个小妹妹是否时尚？侬就要看搿个不料辣辣伊个皮肤浪向个覆盖面个大小。面积越小越前卫，面积越大越保守。现在对伐，一点一点美女，一点身材好个小姑娘真个开心，侬想着啥个衣裳侪好着。别过有个趋势，娜觉着伐？衣裳老怪个。衣裳勿是传统意义浪个衣裳了。衣裳伊越来越往上头窜了。乃末裤子呢？越来越朝下头氽个。葛末迭个阿拉晓得叫露跻装。有两个小妹妹对伐氽了忒过头了。前头前头是露跻个，后头一条沟也出来了。搿我就看勿懂了。迭个啊是忒过分了。我两个外甥女也是搿恁介个。我讲妹妹啊，侬前头搿个爷叔晓得个叫露跻装。后头注意点，沟也出来了，忒难看了。迭个算啥个式子啦？阿叔侬懂勿啦？迭个叫散热沟。搿也说一种时尚。 侬讲阿拉老早底，假使啥人有副蛤蟆镜勿得了哦。八十年代初？侬有只蛤蟆镜，就是迭个麦克哈里斯个蛤蟆镜，勿得了噢！乃末迭块糖纸头打煞伊也勿拉脱伊个。带了三四年搿块纸头还带了嗨。万一假使落脱，伊看看旁边没人，啪拿起来，bia再搭上去。