广播专辑 周立波海派清口10 上海的吃

广播专辑 周立波海派清口10 上海人个吃 我再讲讲阿拉上海人个吃。上海人大家晓得个，侪是吃泡饭长大个。对伐？乃末，阿拉老早面粉，阿拉绝对属于从标准面粉吃到精白面粉，现在又从精白面粉吃回到标准面粉。老早底吃标准面粉属于因为呒没钞票。现在吃标准面粉属于侬又品位。因为属于健康食品。对伐？原来，侬讲七十年代有啥物事好吃啊？真个呒啥物事吃噢。七十年代么正好长身体个辰光，所以侬看长僵脱了。我营养好点因该辣辣一米九五以上。没物事吃呀。 老早底侬讲上海人吃点啥物事？呶？还有点印象个。我点大哥哥大姐姐，伊拉比方去拉练了去学农了。对伐？只有爷娘拼仔命哦帮伊炒一斤炒麦粉。搿个辰光炒麦粉已经算结棍个唠。就是拿伊炒得黄哈哈黄哈哈。就放到罐头里去了，算点心。就像阿拉现在曲奇饼干一样。屋里条件好点人呢？稍微撒点白砂糖摆了里向。吃一口老吓人哦。吃一口侬勿吃茶个闲话呢？一呛叭咳嗽喷出来个是一团烟噢。炒麦粉勿好干吃个晓得伐？应该水里调一调。有种实在急吃一口搿恁一呛嘭bia就像我前头跑出来个，一团烟，罪过哦。阿拉上海人迭个四大金钢啊，大家晓得哦。大饼，油条，耔饭，豆腐浆，四大金刚。现在条件好睐。.....啥物事侪吃得起。侬要吃油条？侬一天吃六十根也覅紧。但阿拉上海人老早底屋里吃根油条属于开荤哦。对伐？阿拉屋里向四个人，爸爸，妈妈，我，姐姐四家头，阿拉姆妈买油条个闲话基本浪就买两根。两根买回来后用剪刀切.....摆了盆在里，再再再拌一碗迭个酱麻油沾沾，就算开荤喽。一个礼拜最多吃一趟。侬讲是伐？假使阿拉姆妈心态好心情好，最多再加一趟拨阿拉，勿得了了。我辣辣油条搿个事体上头啊，勿晓得拨阿拉姆妈吃过几趟生活了。后来阿拉姆妈就勿叫我买油条了。或者我买一趟就闯一趟祸。闹闹娜讲油条啥地方最好吃。唉，两只尖尖头最好吃。阿拉姆妈只要叫我去买油条，我总共拿两只尖尖头摘（dik）脱。乃末我尖尖头摘脱，阿拉姆妈再来摘我。只有啥个辰光是叫我去买个呢？就比方讲屋里请木匠来了。屋里向请裁缝来了，阿拉姆妈忙勿开，葛末就叫我去了。一买买十根油条哦。十根油条搿辰光哎了得啊。侬搿辰光一枪头买十根油条，人家吓一大跳。搿种感觉就好比侬现在跑到南京路亨得利，侬讲：师傅，帮我拿三只劳力士。就是迭种感觉啦，结棍。十根油条一买绝对属于超级大户了。乃末阿拉姆妈叫阿拉去买油条个辰光呢，总归发两根筷子拨我。对伐？阿拉上海人买油条根数多乃用筷子穿个。乃末我拿好筷子：阿姨，拨我来十根油条。宕穿好仔，勿太平了。晓得我摘滴滴头，回去要摘我个。但是还是控制勿好。一路浪只有八分钟辰光。....八分钟哦，廿只滴滴头全部拨我摘光。回去末又是一顿生活呀。因为拿勿出手了啦。对伐？只好剪开来波裁缝吃。所以讲就要吃生活。 还有阿拉上海人屋里向每家人家侪有个，但是呢老希奇个，外加自家勿舍得吃个。但是每家屋里侪是有个。是辣铁罐头里向。啥物事大家还晓得伐？麦乳精！麦乳精分两种颜色。一种是咖啡颜色，还有一种是黄颜色。对伐？！哎？娜讲麦乳精哪能吃最好吃？对个，干吃。但是，有几家人家吃得起啊？我为干吃个事体也拨阿拉姆妈干打过个。但是，就是讲阿拉屋里向麦乳精蛮多个。阿拉屋里麦乳精蛮多个，迭个后头有只故事个。我先讲阿拉搿辰光麦乳精为啥介（ga）稀奇，稀奇到搿恁程度。我到阿拉同学屋里向去。阿拉同学个妈妈为了表示对我个善意，泡了杯麦乳精拨我吃。勿得了哦，拨小鬼头吃杯麦乳精哦。勿得了。但是就是讲我看伊搿只麦乳精端上来以后啦，我端过来一看，要死，哪能对过人也照得出个啦？伊勿舍得摆晓得伐？伊摆麦乳精像摆鸡精搿恁介。就搿恁洒个五六粒。迭个也倒算了啦。伊还摆根筷子帮我讲：调一调，调一调。哎，介谈么？伊还叫我调一调调一调。调一调调一调。调得了本来还有点混个，一调调得了杀辣清噢。....但是阿拉屋里麦乳精哦要比人家屋里多交关。为啥道理晓得伐？迭个搭阿拉爸爸搭界个。