广播专辑 周立波海派清口13 降低笑的成本

广播专辑 周立波海派清口13 降低笑个成本 迭个，啥搿恁个，阿拉屋里向呢是宁波人，是宁波上海人。就像阿拉姆妈讲个，侬演出个辰光，一定要懂道理，观众拍一趟手，侬就要句一趟躬。娜拍一趟，我鞠一趟。但是谢谢娜，娜娜千万覅连唠仔拍，搿恁我要厥过去个。 .....快乐是最真实个！明朝个钞票侪是假个。因为为啥？因为明朝有忒多个勿确定。所以今朝大家到搿搭来是明智个选择。真个呀！今朝个快乐是最真实个。娜去想！如果讲娜娜拿380块洋钿摆了屋里个台子浪。朝牢伊看两个钟头，娜会笑伐？勿会笑！如果娜从屋里向看牢380块，看两个钟头娜要笑个说话？我马上拿娜送到医院去。但是娜花了380块280块迭能到美琪来看周立波，看周立波两个钟头，如果娜勿笑个闲话呢？娜就拿周立波送到医院去。所以既然大家来了，就要开怀个笑。有笑呒笑。有笑也要笑，呒笑也要笑。多笑一趟就合算一趟晓得伐。笑一趟就降低快乐个成本。比方讲：阿拉搿搭个观众今朝邪气奔放，娜笑了五百趟。娜放心，一定会超过个。搿是我对娜个承诺。葛末搿搭一边观众比较矜持。娜只笑了450趟。也就是讲娜吃亏了50趟。也就是讲娜搿搭嗒了50趟便宜。迭个世界浪嗒勿着便宜就算吃亏个。所以大家一定要多笑。笑一趟就降低快乐个成本。对伐？娜去想，娜迭个380块放了屋里没用哎？呶呶侬叮牢伊看两个钟头。侬最多看出来，哟，迭是张假币么？！迭个是H头HD当头个么？！最多搿恁了。来到搿搭就会老开心老开心。 搭大家简单汇报一下，.....乃末到啥地步晓得伐？到阿拉上级单位文广演艺集团，阿拉上海市演艺集团个领导叫我去谈闲话睐。领导一般性一看到侬好了就吊侬去谈闲话睐。.......阿拉现在想了，准备2009年个9月份，让我一家头跑到万体馆去，伊拉当我是憨大还是白痴？万体馆哎,娜当伊是痰盂罐啊？大舞台哎？娜当我是夜壶蛋啊？噢周立波一家头跑到万体馆里向去？对牢8500个观众？搿又勿是开公判大会？！我讲娜啥个意思啊？葛末领导讲：立波，侬误解了。.....侬去想，阿拉上海作为偌大个国际大都市，我们像侬搿恁有号召力个本土明星并勿多。哎，我晓得了，迭个属于彩色翎子搭彩色马屁。听听了老适意个。拨人认可总共是开心个。伊讲：侬去想，每年到下半年，港台明星侪会到上海来开演唱会，阿拉总归有个把人出来顶一把伐。侪来睐，阿拉搿搭要有人出去顶。我想道理也对。点港台明星是一到下半年就到阿拉上海来了。其他侬勿要讲，就将搿个费玉清，费玉清我帮伊算过了，伊已经连牢四年到阿拉上海来了，连来四年，连连爆满，每场侪爆满，但是有问题个。伊对伐？每次开好演唱会以后，第二天钞票拿好，伊就跑脱喽。伊勿蹲辣阿拉上海消费个。搿对拉动阿拉整个上海个GDP呒没任何个好处个嘛。葛末迭个问题就来了。我觉着我作为一个上海人，我应该出去迎击一下。再讲费玉清是我邪气欢喜个一个演员。我欢喜听伊唱歌。搿种气质多少嗲啊。搿只男人老嗲哦。搿只男人唱歌，哎，真个，伊搿种气质，.....像查啊里只灯泡坏脱一样。但是凭良心讲，歌唱了真个嗲。形象气质也嗲。搿种形象真个是，真个费玉清嘭台浪向一立，绝对是真个是玉树临风，沉鱼落雁，羞花闭月。娜去想，一个男人立辣台浪向，娘娘腔，但是人家勿触气，迭个绝对有难度哦。所以我接受迭个挑战。我可能九月份真个会跑到万体馆去，我准备准备唱了费玉清前头，全部唱伊个歌，拿伊歌全部唱光，票价只买伊一半。