广播专辑 弄堂茄山胡24 淮海中路弄堂旧事体

茄山河 淮海中路弄堂旧事体 杨忠明 　　文 / 杨忠明　　 　　老早点我住辣淮海中路613弄“乐安坊”12号底楼，搭外婆住了一道。埃个辰光，辣老北站，侬只要讲到乐安坊去！踏三轮车个脑子反应老快，马上晓得辣拉淮海中路。“文革”前头，乐安坊弄口，总归有一长排三轮车辣等客，伊拉真苦恼，饭来勿及喫，就到旁边头“茅万茂”老酒店里买包猪头肉用手捞来吃，一边啃一只冷脱个老虎脚爪…… 　　乐安坊里有个弄堂菜场，大黄鱼、车扁鱼、乌贼咾啥侪有的卖，几角洋钿一斤。秋天刮西北风了，我辣天井门口往外看，一部黄鱼车装仔大闸蟹五角一斤，还少人问津。一歇歇，有个老头浜挑两只竹筐大声喊“旧货啊……买烂东西”，外婆寻出一只翡翠手镯，贩子看后嘿嘿一笑，不值钞票，二块洋钿，帮侬收下来，好？拿去拿去，掼辣海也呒没用场，外婆嘀咕着。伊辰光我人小，看勿懂啥名堂，只看见迭只亮晶晶玻璃样子个圈圈，邪气邪气绿！“阿明，拨侬五角洋钿，去光明村买肉包子吃！”外婆说。哈哈，有吃，我与表弟、表妹侪好开心哦！ 　　我喜欢淮海路浪个“培丽土产店”，里头酱菜有几十种，有日外婆带我去买过泡饭吃个虾油卤小酱瓜、玫瑰大头菜、臭乳腐，还买点香椿头，带一瓶苏州虾籽酱油，迭点物事侪是上海人老喜欢吃个。回到屋里向，舅妈弄菜，香椿芽开洋拌豆腐、大头菜炒毛豆子、虾籽酱油浇辣拉冷拌黄瓜上，外婆又烧一盆乌贼鱼大烤，娘舅讲，味道侪老鲜个，交关好吃…… 　　长春食品店买水果个脱顶师傅同阿拉表弟邪气要好，暑假里，西瓜运到，堆辣拉好像一座小山，刚刚跌破脱个只买拨阿拉二分洋钿，眼睛眨眨，侬接翎子，意思意思。我最喜欢吃浜瓜，又甜又脆水又多，就是贵了点，要一角一斤。 　　乐安坊对过有爿熟肉店，也买鲜猪肉，来了客人，外婆拨我三角钞票，要我去斩点夹心肉，记得买肉个老客气，还硬要斩一点肉加送拨侬。肉店隔壁十二女中弄堂里就是名气老响个“伟民集邮社”，从早到夜挤满调邮票个人，我小辰光也会轧进去混辣当中买点邮票白相相。 　　“文革”时，茅万茂西隔壁有家瓷器店，有一日突然摆出交交关关抄家处理个陶瓷花瓶、碗、盆、碟、人物摆件咾啥，花里八拉堆满几张桌子，写着“四旧废物利用”，我爷骨董蛮识货，曾辣里头淘到几只古玩瓷，“文革”后一只蛮像“官窑”个碗卖拨东台路旧货摊个老丁，弄到一千块，勿要太开心噢。 　　海淮中路，我老早点个弄堂生活，一切好像辣梦中，现在想想蛮好白相。