广播专辑 弄堂茄山胡49-酸梅汤

广播143 弄堂茄山胡-酸梅汤 酸梅汤 2012-08-22 14:27 来源：新民晚报 作者：胡宝谈 新民网编辑：王玲 　　 【新民晚报·推荐】妹妹头啊，酸梅汤顶欢喜吃。只消酸梅汤有得吃，啥雪【xik】糕咾啥蛋糕咾伊看也覅看。【dha】姆妈带伊出去，两只脚跑发跑发，肚皮里头念头也转发转发，算算看跑仔六七条小马路拉哉，妹妹头假佯头跍【ghu】辣地浪，姆妈姆妈，我脚脚酸跑勿动了呀。姆妈笑笑，侬啥场化酸啊？是脚酸啊？妹妹头晓得穿帮【bang】哉，伊也笑出来，手节头点点自家小嘴巴，“啊啊。”“嚎，侬又【yhi】要加油了啊！”姆妈买仔一杯冰冻酸梅汤。味【mi】道【ze】来，妹妹头一口气吃了精打光，写意啊，舌头瀴【yin】到脚节头。又跑仔四条大马路，妹妹头一路浪小嘴巴咂【zak】发咂发，哪能越咂越淡洁刮辣，后首来酸味道一眼眼也咂勿出啦？嘿嘿，馋唾水咽【yi】咽，小眼睛东张西张，拖咾拖，拖咾拖，门前一爿【bhe】冷饮店，哎呀，哪能拖勿动拉哉，姆妈一望妹妹头又跍下来哉。“啊啊。”手节头点点小嘴巴。姆妈好气咾好笑，存心吓吓伊：“妹妹头，吃介许多酸梅汤，当心肚皮做米醋缸噢。”“姆妈，外婆讲吃酸梅汤好个，解【ga】暑个。外公讲吃酸梅汤清肠胃个。爹爹讲吃酸梅汤开胃个。”姆妈面孔一板像煞生【sang】气哉。“妹妹头，酸梅汤开胃啊？侬昨日夜饭哪能只吃一沰【dok】沰？吃好朝爹爹眼睛【sak】，来煞勿及两家头散步去，阿是又加油去了啊？”“姆妈，”妹妹头望望姆妈面孔板起仔，像煞火气蛮大。“侬也顶好吃杯酸梅汤，降火气个。”姆妈一记头屏勿牢，“气”一声笑出来。“辣末一杯了噢。勿好再吃了噢。少吃多滋味，多吃坏肚皮，晓得？”“晓得了呀姆妈！我会得省省吃个！”妹妹头一小口一小口，吃小老酒介渳【mi】发渳发，渳到屋里门口头挺剩小半杯，想想一口头，想想姆妈关照过，正朝勿好买了，搿个小半杯我囥【kang】辣冰箱里头，挺到夜头吃。跑去开冰箱个当口，耳朵里奯【huak】【guak】着一声，姆妈话屋里只三五牌台钟辰光勿准要加加油唻。爹爹台钟掇【dak】到八仙桌浪，后盖挢开来看看看，嗯，是要加油哉，我油寻寻看去。妹妹头转念头，跑来跑去啥体，冰箱里头勿是“油”现成个末。嘿嘿，爹爹前脚跑，跟脚小半杯酸梅汤倒进去。姆妈平常日脚讲我嘴巴谗痨，吃起来冲辣顶前头，做起事体缩辣顶后头，正朝我要争【zang】眼气，嘿嘿，姆妈看我介巴结，一捂心作兴又买杯酸梅汤我吃。爹爹转来一望，哎呀，哪能台钟里头侪黏【ni】格格酸梅汤啦。“喂喂喂，啥人做个好事体啊？”“我呀！我呀！”妹妹头手拍拍。“爹爹，我乖？我拎得清？侬豪燥【sao】脱姆妈话呀！”“侬啊，再拎得清也呒没唻。”“咦，爹爹，侬像煞来触我霉头啊？是姆妈讲个呀，台钟要加油了呀。”“台钟加个油勿是侬要加个油，晓得？”“葛末啥油啊？”“机油呀。”“鸡油啊？味道好吃？”哈哈，姆妈听见仔房间踏进来，妹妹头小耳朵辣辣长，也请伊吃样物事——吃排头。“侬个小人啊，独想酸梅汤，别个事体侪勿上心。我碰着侬也真叫吃酸。”妹妹头伤心煞，面孔哭出乌拉。“算唻家主婆，小人也是好心，好心办仔坏事体呀。妹妹头，覅哭唻。下转做事体，听听清爽先晓得，勿然【shoe】介闯祸个呀。”“我……呜呜呜……”妹妹头眼泪水一大泡。“我，我勿是哭台钟呀，我嘴巴里硬劲省下来个酸梅汤侪拨台钟吃脱了呀！”